पौष १७, डोटी । डोटीबाट नवनियुक्त नेपाल सरकारका संघीय वन तथा वातावरण मन्त्री प्रेम आलेमगरले आफ्नो कार्यकाल छोटो भएको भन्दै ४ महिने अवधीमा १६ महिनामा हुने काम गर्ने गरी अगाडी बढ्ने बताएका छन् ।
प्रधानमन्त्री के.पि.शर्मा ओली नेतृत्वको सरकारमा मन्त्री नियुक्त भएपछि पहिलो पटक गृह जिल्ला डोटी पुगेका मन्त्री आलेले यस्तो बताएका हुन् ।
अहिलेको सरकारका नेतृत्वकर्ता नेकपाका अध्यक्ष एवं प्रधानमन्त्री के.पि.शर्मा ओली राज नेता भएको भन्दै सुदूरपश्चिमको इतिहासमै एकै पटक ४ जना मन्त्री दिएकोमा यसलाई अवसरका रुपमा लिनुपर्ने उनले बताए ।
प्रधानमन्त्री ओलीले पहिलो पटक सरकारको नेतृत्व गर्दा लामो समयको नाकाबन्दीको सामना गरेर होस वा संविधान निर्माण गर्दाको बेलामा खेलेको भूमिकाका कारण नेकपाले दोश्रो पटक निर्वाचित भएर सरकारको नेतृत्व गर्न सफल भएको बताए । करिब २ तिहाइ नजिक पुगेको सरकारले संविधानको मर्म अनुरुप देश विकास र शान्ति सुरक्षा कायम गर्दै देशले गुमाएको भूमि लिपुलेक कालापानी फिर्ता ल्याउन पहल गर्दागर्दै आफ्नै पार्टीबाट असहयोग भएको बताए । आफ्नै पार्टीभित्रबाट खुट्टा तान्ने काम भएको र काम गर्न दिने वातावरण नभएको उनले बताए । बरु उल्टै सम्माननीय प्रधानमन्त्री विरुद्ध अविश्वासको प्रस्ताव ल्याउने, राष्ट्रपतीलाई महाअभियोग लगाउने दुस्प्रयास भएपछि प्रधानमन्त्रीले संसद विघटन गर्नुपरेको मन्त्री आलेले बताए ।
देशभरका करिब ६४ प्रतिशत नेपाली जनाताबाट निर्वाचित भएका सार्वभौमसत्ता सम्पन्न प्रतिनिधी सभा विघठन भएर ताजा जनादेशका लागि निर्वाचन मिति तय भैसकेकोले त्यसको स्वागत गर्नुपर्ने उनले बताए ।
वर्तमान सरकारका नेतृत्वकर्ता राजनेता प्रधानमन्त्री ओलीले आफुलाई जिम्मेवारी सुम्पिएकोमा आभार व्यक्त गर्दै वन क्षेत्रमा रहेका थुप्रै चुनौतीको सामना गर्दै अगाडी बढ्ने बताए ।
डोटेली जनताको साथ र मतले देशभरीका ३ करोड बढी जनताको मन्त्री बन्न सफल भएकोमा आफ्ना मतदाताहरुलाई विशेष धन्यवाद दिए । प्रधानमन्त्रीले दिएको जिम्मेवारी अनुसार प्रधानमन्त्री र डोटेली जनताको शीर ननिहुरिने गरि काम गर्ने विश्वास दिलाए ।
वन तथा वातावरण मन्त्रालयमा जिम्मेवारी पाएका पूर्व मन्त्रीहरुले गरेका कामहरुमध्ये छोटो कार्यकालमा पनि आफुले उत्कृष्ट काम गरेर मात्रै निस्कने उनले बताए ।
यो मन्त्रालयले ठूला ठूला पोखरी बनाउँने, पहिरो आउने ठाउँमा वृक्षारोपण गर्ने, जडिबुटी उत्पादन र प्रशोधन गर्ने उद्योग सञ्चालन गर्ने, चिडियाखाना बनाउँने र रोजगारी दिलाउने काम गर्ने बताए । आफुले डोटेली जनताको भावना अनुसार देशभरका ७७ जिल्लामध्ये बढि से बढी बजेट डोटीमा हाल्नुपर्ने जिम्मेवारी रहेकाले आफु त्यसमा लागिपर्ने मन्त्रीले प्रतिबद्धता जनाए ।
नेकपा डोटीले आयोजना गरेको सरकारले घोषणा गरेको मध्यावधी निर्वाचनको स्वागत र नवनियुक्त मन्त्री आलेको स्वागत तथा बधाई एवं कार्यकर्ता भेलालाई नेकपाका केन्द्रिय नेताहरु गौरी ओली, डिल्लीराज भट्ट, नारद मलासी, दीर्घराज बोगटी, डम्बर सिंह, प्रदेश नेताहरु, जिल्ला नेताहरु लगाएतले संवोधन गरेका थिए ।
नेकपा डोटी जिल्ला कार्यालय सदस्य एवं जिल्ला समन्वय समिति प्रमूख रामबहादुर ऐरको अध्यक्षतामा सम्पन्न कार्यक्रममा नेपाली काँग्रेस परित्याग गरी पूर्वीचौकी गाउँपालिकाका ६ जना नेकपामा प्रवेश गरेका छन् ।
आजै मन्त्री आलेले डोटीका सरकारी कर्मचारीहरुसँग छलफल कार्यक्रममार्फत जनताको जिउधनको सुरक्षा, दैनिक सेवा छिटोछरितो हुने गरी काम गर्न जिल्लाका सरकारी कर्मचारीहरुलाई निर्देशन समेत दिएका छन् ।
प्रकाशित मिति: शनिवार, पुष १८, २०७७, १०:०६:००
